«Дос-Мұқасан» тобының негізін қалаған, академик Досым Сүлеев аты аңызға айналған ансамбльдың тойға шығып, ақша табуға мәжбүр екенін айтты, деп хабарлайды Экспресс К.
Бұл туралы Досым Сүлеев Youtube-тегі TALKLIKE бағдарламасына берген сұхбатында айтты. Онда академик "Дос-Мұқасан" тобының қалай құрылғанын және ансамбльдың қазіргі жай-күйі туралы баяндайды. Оның айтуынша, топ мүшелері ақша табу үшін той-томалаққа шығуға мәжбүр.
«Қазіргі заманда ақша табу керек қой. Олар концерттен көп ақша таба алмайды. Оның үстіне концерт күнде бола бермейді ғой. Ал тойда біраз ақша төлейді. "Дос-Мұқасан" деген аты бар. Олар тойға шығуға мәжбүр», - деді Досым Сүлеев.
Биыл «Дос-Мұқасан» ансамбліне 55 жыл толды. Осының құрметіне Ұлттық киноны қолдау мемлекеттік орталығының қолдауымен «Дос-Мұқасан» музыкалық көркем фильмі түсірілген болатын.
